LUKAT A SURAT KADAGITI ABADILLA

LUKAT A SURAT KADA ANTHONY KEN LAMAR ABADILLA,

NATURED A DADAKKEL NI CARL ANDREW

Patgenmi nga Anthony ken Lamar,

Iti nagan ti agkaykaysa a dangadangtayo tapno matunton ti nalinteg a dana nga agtunda iti kinapudno ken panagwayawaya, itedmi kadakayo ti panagsaludar.

Kasta met a kalukon daytoy a lukat a suratmi ti araraw a sapay koma ta adda kadakayo ti pammaregta ti Namarsua, ti panangitedna kadakayo iti lawag iti panunot, ken ti panangsaluadna kadakayo tapno iti kasta ket masindadaankayo a mangaramid iti maikanatad, ken maikanatad gapu ta ar-aramidenyo daytoy saan laeng iti nagan ni Carl Andrew nga anakyo, no di ket iti nagan itan dagiti dadakkel a gapu a pakaibilangan ti umno a panagrespetar ken panangipateg iti lengguahe ken komunidad nga Ilokano, iti nagan ti makapagwayawa nga edukasion, ken iti nagan ti justisia a panggimong.

Gapu iti turedyo a mangtunton iti kinapudno, lugayandakayo.

Gapu iti diyo panangipalubos a maipapaigid dagiti karbengan ni Carl Andrew, matdakami nga agdaydayaw kadakayo.

Gapu iti panangitedyo iti pudno a gatad ti makunkuna a justisia a panggimong, sinursuruanyo ti entiro a komunidad nga Ilokano ken dagiti aminen nga etnolingguistiko a komunidad no kasano nga ikkan iti importansia ti maysa a lengguahe a balay ti kararua ken kinaasinno ti maysa a tao.

Ket gapu kadagitoy nga impakitayo kadakami, makautangkami amin kadakayo iti naimbag a nakem.

Ngem awan maisubadmi kadakayo no di ti panangikarimi nga addakami a kanayon iti sibayyo manipud ita, a dikami pumanaw iti abayyo, a dikami met mamingga a mangited iti dawdawaten daytoy nasagursor a panagdaliasatyo iti nagan ti pudno ken kinalinteg: ti panangkadkaduami kadakayo.

Ita, siimatang ti entiro a komunidad nga Ilokano kadakayo.

Ita, siimatang dagiti nagduduma nga etnolingguistiko a komunidad iti Filipinas iti daytoy nga ipakpakitayo a nainnakman nga aramid.

Ita, siimatang ti entiro a lubong iti kastoy a panagtestigoyo a rumbeng ken nasken nga irupir dagiti basar a kalintegan iti kinatao, iti edukasion, iti wayawaya, iti lengguahe, ken iti kultura.

Daytoy nga aramidyo a kinatured ket maysa a pudno a panagsaksi, ket paggaammomi nga ipatawidyonto daytoy a nabaknang a sarita ken Carl Andrew.

Ngem maysa a banag ti diyonto mapengdan: nga iti panangipatawidyo kenkuana iti daytoy nga estoria ti kinalinteg dagiti aramidyo, ipatawidyonto met daytoy iti puli nga Ilokano, ken kadagiti aminen a komunidad a maiduron a kastoy a kapay-an.

Simbolokayon dagiti nagkaadu nga aramid: itan ket ti nainggimongan a panagkitakittayo pagkitakitantayo kadagiti pasamak ken banag nga awanan kinalinteg.

Simbolokayon dagiti tagainep ken araraw iti panagwayawaya ket sapay ta agingga iti inggana, adda kadakayo ti pia ken karadkad tapno iti kasta ket babaen kadaytoy naindaklan nga aramidyo, masirayantayo amin ti lawag nga ipapaidamda kadatayo ita.

Ti espiritu ti biag ti adda koma kadakayo.

Siraraem kadakayo,

Aurelio Solver Agcaoili &

Raymund Ll Liongson

Internasional a Komite a Mangsupsuporta Kada Bautista, Abadilla, ken Respicio/

Nakem Conferences