LUKAT A SURAT KEN SUPERINTENDENTE PASTOR
(Agpada a naiyi-meil daytoy a surat ken nairakurak kadagiti blog
ken sabali pay a sitio iti Internet, Agosto 10, 2013)
10 Agusto 2013
Apo Araceli Pastor
Superintendente
Division Dagiti Eskuelaan ti Ciudad
Ciudad ti Laoag
Patgenmi a Superintendente Pastor,
Publiko
nga inwaragawagyo a narisuten ti kaso a nakairamanan dagiti tallo nga
estudiante a ‘binalakadan’ ti eskuelaanda, ti Saviour’s Christian Academy, a
kumitadan iti sabali nga eskuelaanda kalpasan ti pannakadengngeg kadakuada a
nagilokanoda iti uneg ti eskuelaanda.
Daytoy
a kaso, numan pay nangrugi iti aramid da Kleinee Bautista, Carl Andrew
Abadilla, ken Samuel Respicio ken ti simmaruno nga aramid ni Presidente
Reverendo Dr Brian Shah ken Prinsipal Cristeta Pedro, ket saanen a kaso laeng
dagitoy a partido. Iraman daytoy a kaso ti pannakabalusingsing kadagiti
kalintegan a lingguistiko dagiti estudiante, kalinteganda a karaman dagiti
kalinteganda a pangtao, ken ti di panangsurot iti agdama a direktiva ti gobierno
a Filipinas iti Mother Tongue-Based Multilingual Education.
Daytoy
a kaso ket nakasagpaten iti publiko nga interes. Agpada a dagiti komunidad a
nasional ken internasional ket siaannad nga agsipsiput no kasano a daytoy a
kaso ket naresolvar a kas inwaragawagyo.
Dawatenmi
koma ngarud ti publiko a kontabilidad—ti naynay ken klaro a pannaikalawlawag—ti
resolusion ti nasao a kaso.
Rumbeng
laeng a maammuan daytoy ti publiko.
Rumbeng
laeng a maammuan dagiti amin nga Ilokano iti entiro a lubong.
Rumbeng
laeng a maammuan dagiti amin a tao iti Filipinas.
Siraraem,
Aurelio Solver Agcaoili &
Raymund Ll Liongson
Internasional a Komite
a Mangsupsuporta Kada Bautista, Abadilla, and Respicio/
Nakem Conferences
International
No comments:
Post a Comment